Son Xyon Minning "Tottenxem"dagi kelajagi so‘roq ostida qoldi.
talkSPORT xabariga ko‘ra, londonliklar sardori yozda klubini o‘zgartirishi mumkin - 32 yoshli hujumchi uchun Saudiya Arabistoni Pro-ligasining biryo‘la uch vakili faol kurash olib bormoqda. Janubiy koreyalik futbolchiga asosiy da’vogar sifatida ambisiyali "Al-Ahli" ko‘rilmoqda, biroq unga "Al-Qodisiya" va "An-Nasr" klublari raqobatchi hisoblanadi.
Manbaga ko‘ra, uchala klub ham tajribali hujumchi transferi uchun 40 mln yevro berishga tayyor. "Tottenxem" rahbariyati Sonning 2026 yilning yozida tugaydigan shartnomasi yakunlanishini kutmasdan, uni sotib yuborishni hoziroq ko‘rib chiqishga tayyor. Klubdagilar tushunishadi: 30 yoshdan oshgan futbolchi uchun shuncha pul olish - e’tiborsiz qoldirish qiyin bo‘lgan imkoniyat.
O‘tgan mavsumda Son "shporlar" safida barcha musobaqalarda 46 ta o‘yinda maydonga tushib, 11 ta gol va 12 ta golli uzatmaga mualliflik qilib, o‘zini yana bir bor ko‘rsatdi.
