Сон Хён Миннинг "Тоттенхэм"даги келажаги сўроқ остида қолди.
talkSPORT хабарига кўра, лондонликлар сардори ёзда клубини ўзгартириши мумкин - 32 ёшли ҳужумчи учун Саудия Арабистони Про-лигасининг бирйўла уч вакили фаол кураш олиб бормоқда. Жанубий кореялик футболчига асосий даъвогар сифатида амбицияли "Ал-Аҳли" кўрилмоқда, бироқ унга "Ал-Қодисия" ва "Ан-Наср" клублари рақобатчи ҳисобланади.
Манбага кўра, учала клуб ҳам тажрибали ҳужумчи трансфери учун 40 млн евро беришга тайёр. "Тоттенхэм" раҳбарияти Соннинг 2026 йилнинг ёзида тугайдиган шартномаси якунланишини кутмасдан, уни сотиб юборишни ҳозироқ кўриб чиқишга тайёр. Клубдагилар тушунишади: 30 ёшдан ошган футболчи учун шунча пул олиш - эътиборсиз қолдириш қийин бўлган имконият.
Ўтган мавсумда Сон "шпорлар" сафида барча мусобақаларда 46 та ўйинда майдонга тушиб, 11 та гол ва 12 та голли узатмага муаллифлик қилиб, ўзини яна бир бор кўрсатди.
