Madridning "Real" klubi darvozaboni Tibo Kurtua jamoa yangi bosh murabbiy Xabi Alonsoning talablariga ko‘nikishi uchun vaqt kerakligini tan oldi.

"Qaymoqranglilar" ispaniyalik murabbiy qo‘l ostidagi dastlabki o‘yinda g‘alaba qozona olmadi - klublar o‘rtasidagi jahon chempionati guruh bosqichining birinchi turida "Al-Hilol" bilan 1:1 hisobida durang o‘ynadi.

"Karlo Anchelotti davrida to‘rt yil davomida ishlab chiqilgan avtomatizmlardan bir necha kun ichida voz kechish mumkin emas. Xabi Alonso hujum va himoyada boshqacha o‘yin tamoyillariga ega. Bizdan ko‘proq to‘pga egalik qilish talab etiladi. Tezroq tushunib olish uchun ko‘plab videolar ko‘ramiz. Bugungi o‘yindan saboq olishimiz kerak," - dedi Kurtua o‘yindan keyingi intervyusida.