Meksikaning “Monterrey” klubi markaziy himoyachisi Serxio Ramos joriy yilgi Klublar o‘rtasidagi jahon chempionatida kimni bosh favorit deb bilishini aytdi. Bu haqda Euro-Football nashri xabar berdi.

39 yoshli ispaniyalik futbolchi bu borada kutilganidek o‘zining sobiq jamoasi — “Real Madrid”ni ajratib ko‘rsatdi.

"Klublar o‘rtasidagi Jahon chempionatining favoriti? Menimcha, “Real”ni har doim yirik musobaqalarning asosiy nomzodi deb atash mumkin. U — dunyodagi eng yaxshi jamoa", — deya Ramosning so‘zlarini keltiradi Marca nashri.

Ma’lumot uchun, Serxio Ramos “Real Madrid” safida 16 yil davomida to‘p surgan va ko‘plab sovrinlarni qo‘lga kiritgan.

Madrid jamoasi Klublar o‘rtasidagi jahon chempionatining ilk turida Saudiya Arabistonining “Al-Hilol” jamoasiga qarshi maydonga tushib, 1:1 hisobida durang o‘ynadi.

Ramosning hozirgi jamoasi — “Monterrey” 19 iyundan 20 iyunga o‘tar kechasi “River Pleyt” (Argentina)ga qarshi ikkinchi tur uchrashuvini o‘tkazadi. Meksika klubi ilk turda Italiyaning “Inter” klubiga qarshi maydonga tushib, 1:1 hisobida durang o‘ynagan edi. “Monterrey”ning yagona goliga aynan Ramos mualliflik qildi.