Londonning "Chelsi" klubi bosh murabbiyi Enso Mareska klublar o‘rtasidagi jahon chempionati 1/8 finalidan o‘rin olgan "Benfika"ga (4:1) qarshi o‘yindan so‘ng o‘z fikrlarini bildirib o‘tdi.

Yakunda yirik hisob qayd etilganiga qaramay, o‘yin, yumshoq qilib aytganda, barcha ishtirokchilar uchun oson kechmadi: 86-daqiqada hakam momaqaldiroq tufayli o‘yinni to‘xtatdi - pauza deyarli ikki soatga cho‘zildi. Uchrashuv davom ettirilgach, "Benfika" javob golini urdi - Anxel di Mariya londonliklarning fikricha, xato belgilangan penaltini aniq amalga oshirdi. Qo‘shimcha bo‘limlarda lissabonliklar bir kishi kam bo‘lib qolishdi va ikkinchi ekstra-taymda uch marta gol o‘tkazib yuborib, mag‘lub bo‘ldi.

"Ba’zida hakamning ishi haqida nima deb o‘ylayotganingni aytmagan ma’qul," - dedi Mareska DAZN'ga o‘yindan keyingi intervyusida.

"Chelsi"ning KO‘JCH 1/4 finalidagi raqibi Braziliyaning "Palmeyras" jamoasi bo‘ldi.