Bugun Superliga 14-tur o‘yinlariga yakun yasaladi. Turning so‘nggi bahsida OKMK klubi o‘z maydonida “Surxon”ni qabul qiladi.

OKMK - "Surxon"

Mirjalol Qosimov jamoasida ishlar biroz yomonlashdi. Ayniqsa, terma jamoalar yig‘inidan so‘ng olmaliqliklarni biroz tanib bo‘lmayapti. Natijalar birdaniga yomonlashdi, ochkolar boy berildi. O‘zbekiston kubogini ham tark etdi. Hatto gol urishga qiynalmoqda. Qisqasi, jamoada nimadir yetishmayotgandek. Ochkolarni yo‘qotilishi oqibatida jamoa turnir jadvalida 6-o‘ringa tushib ketdi. O‘ylashimizcha, bu vaqtinchalik holat. Mirjalol Qosimov jamoasi bilan vaziyatdan chiqib keta oladi.

"Surxon" esa asosan yosh iste’dodlardan tashkil topgani boisdan, natija bosimi ancha kam. O‘tgan yilgi barqarorlik ham yo‘qolib qolgandek. Bir qarasangiz, “Paxtakor”ni yutishi, “Nefchi”dan ochko tortib olishi mumkin. Boshqa bir o‘yinda “Sho‘rtan”ga yutqazishi ham mumkin. Qisqasi, barqarorlik yetishmayapti. Bu tarkibda yoshlarning ko‘pchilikni tashkil etishi bilan bog‘liq bo‘lishi mumkin.

Bu qarama-qarshilikda OKMKda biroz ustunlik bor. Balki jamoa bugun ketma-ket o‘tkazgan omadsiz o‘yinlariga barham berishi mumkin.