"Barselona"ning Niko Uilyamsga maosh bo‘yicha taklifi "Atletik"nikidan pastroq edi.
Kecha bask klubi kataloniyaliklar da’vogarlik qilayotgan 22 yoshli vinger bilan kelishuvni 2035 yilgacha uzaytirganini e’lon qildi.
Avvalroq Uilyamsning yangi shartnoma bo‘yicha maoshi soliqlar to‘langandan keyin yiliga 10 mln yevrodan ko‘proqni tashkil etishi xabar qilingandi. The Athletic nashri ushbu summani tasdiqladi va Nikoning klub tarixidagi eng ko‘p maosh oluvchi futbolchiga aylanishini qo‘shimcha qildi.
Qayd etilishicha, "Barselona" futbolchiga 10 mlndan kamroq (8 mln atrofida) maosh taklif qilgan.
Qayd etilishicha, "Atletik" to‘lovlar borasida qulayroq sharoitda. Basklar mamlakatida, xususan, poytaxti Bilbao bo‘lgan Biskayya provinsiyasida futbolchilarning maoshlarini soliqqa tortishning alohida qoidalari amal qiladi. Sportchilarga nisbatan pasaytirilgan stavka qo‘llaniladi, chunki mahalliy hukumat ularning ish staji boshqa har qanday doimiy ishchiga qaraganda kamroq deb hisoblaydi.
