"Manchester Siti" o‘zining rasmiy saytida kelasi mavsumga tayyorgarlik jarayonida "Palermo"ga qarshi o‘rtoqlik o‘yini o‘tkazishini ma’lum qildi. Jamoalar 9 avgust, shanba kuni "Renso Barbera" stadionida o‘ynaydi.
"Palermo" ham City Football Group xoldingiga kiradi, ya’ni klublar hamkor hisoblanadi. 2022 yilda Italiya klubi xoldingning 11-a’zosiga aylangandi.
Aytish kerakki, "Palermo" Italiyaning ikkinchi darajali futbol divizioni - B Seriya vakili hisoblanadi. U yerda "qizil-qoralar" o‘tgan mavsumda sakkizinchi o‘rinni egallagandi.
