"Chelsi"ning qanot hujumchisi Noni Madueke "Arsenal"ga o‘tishga yaqinlashmoqda. Insayder Nikolo Skiraning ma’lum qilishicha, 23 yoshli futbolchi "Arsenal" bilan 2030 yilgacha bo‘lgan shaxsiy shartnoma shartlarini kelishib olgan.

Biroq, klublar hali o‘zaro kelishuvga erishmagan, chunki "to‘pchilar"ning 45 million yevro va qo‘shimcha bonuslar taklifi "ko‘klar"ni qoniqtirmayapti.

Manbaning xabar berishicha, "Chelsi" 65 million so‘ramoqda, shundan so‘ng klub transferga rozilik berishga tayyor.

Klublar o‘rtasidagi jahon chempionatida Madueke beshta o‘yinda ishtirok etdi, ammo birorta ham samarali harakatni qayd etmadi.

Umuman olganda, qanot hujumchisi mavsumda 46 ta uchrashuvda 11 ta gol urdi va 5 ta golli uzatma bajardi.