"Tottenxem" markaziy himoyachisi Kristian Romero yozda klubni tark etishi dargumon.
Turli manbalar argentinalik futbolchining Madridning "Atletiko" klubiga o‘tishi yaqinligi haqida bir necha bor xabar bergan, ammo "matraschilar" baribir "shporlar" bilan bitim shartlari bo‘yicha kelisha olmagan. Nufuzli insayder Fabrisio Romanoning ma’lum qilishicha, 27 yoshli futbolchi hozirgi transfer oynasida kutilmagan voqealar yuz bermasa, hech qayerga ketmaydi.
Transfermarkt ekspertlari Kristian Romeroning narxini 50 mln yevroga baholamoqda. Futbolchining London klubi bilan amaldagi mehnat shartnomasi 2027 yilning yarmigacha mo‘ljallangan.













