"Ayaks" markaziy yarim himoyachisi Kennet Teylor faoliyatini "Portu"da davom ettirishi mumkin. Bu haqda insayder Fabrisio Romano xabar bermoqda.

Manbaga ko‘ra, "Portu"ning yangi bosh murabbiyi Franchesko Farioli yarim himoya chizig‘ini kuchaytirish uchun Teylorni ideal nomzod deb hisoblamoqda. Ayni paytda klublar o‘rtasidagi muzokaralar davom etmoqda. Shu bilan birga, manbaning ta’kidlashicha, "Portu" ro‘yxatida boshqa variantlar ham bor.

Teylor "Ayaks" tarbiyalanuvchisi hisoblanadi. O‘tgan mavsumda 23 yoshli futbolchi barcha musobaqalarda 52 ta o‘yinda maydonga tushib, 15 marta raqiblar darvozasini ishg‘ol qildi va 8 ta golli uzatmani o‘z hisobiga yozdirib qo‘ydi.

Transfermarkt mutaxassislari Teylorning narxini 28 million yevroga baholamoqda.