"Chelsi" klublar o‘rtasidagi jahon chempionatidagi g‘alabadan keyin homiylar uchun yanada jozibador variantga aylandi.

Ingliz klubi finalda "PSJ"ni yirik hisobda mag‘lub etib (3:0) turnir g‘olibiga aylandi.

The Telegraph nashrining yozishicha, bu muvaffaqiyat londonliklarga bir yil oldin rad etilgan takliflarga nisbatan 100 million funt ko‘proq foyda keltirishi mumkin bo‘lgan futbolkadagi titul homiy bilan yangi shartnomaga yo‘l ochdi.

Shuningdek, "Chelsi" futbolchilari g‘alaba uchun mukofot puli - taxminan 350 ming funt olishlari aytilmoqda.

Bir yil avval "Chelsi" futbolkalarga logotip tushirish uchun yiliga taxminan 40 mln funt to‘lashga tayyor bo‘lgan ikki kompaniya bilan muzokaralar olib borgan, biroq o‘shanda klub kutishga qaror qilgandi.

Endi bitim yiliga 60 million funt sterlingga tushishi kutilmoqda va hozirda 7-10 ta yirik jahon brendlari bilan muzokaralar olib borilmoqda.

"Agar "Chelsi" o‘tgan yili kelishuvga rozi bo‘lganida, 100 million funtgacha zarar ko‘rgan bo‘lardi. Endi esa, ECHLga chiqib, KO‘JCHda g‘alaba qozongan klubning muzokaralardagi pozisiyasi ancha kuchli," - dedi manba.