Italiyaning "Roma" klubi Braziliyaning "Palmeyras" klubi yarim himoyachisi Richard Riosning transferi bo‘yicha muzokaralardagi ishtirokini to‘xtatdi. Bu haqda jurnalist Janluka Di Marsio xabar bermoqda.
Manbaga ko‘ra, bu qarorga futbolchining narxi balandligi sabab bo‘lgan. Avvalroq, Sankt-Peterburgning "Zenit" klubi Rios uchun 30 million yevro taklif qilgan, biroq futbolchining o‘zi rad javobini bergandi. "Roma" esa undan 6 million kam taklif qilgandi.
Asosan tayanch zonasida harakat qiladigan 25 yoshli kolumbiyalik futbolchi 2023 yildan beri "Palmeyras" sharafini himoya qilmoqda. Joriy mavsumda u barcha mumkin bo‘lgan klub turnirlarida 36 ta o‘yinda maydonga tushib, 4 ta gol urdi va 4 ta golli uzatmani amalga oshirdi.
