Hujumchi Luis Dias "Liverpul"ga jamoani tark etib, faoliyatini aynan "Bavariya"da davom ettirmoqchi ekanligini ma’lum qildi, deya xabar bermoqda jurnalist Florian Plettenberg.
Bild xabariga ko‘ra, myunxenliklar 28 yoshli futbolchi bilan yiliga 14 million yevro maosh bilan 4 yillik shartnoma tuzishga kelishib olgan.
Manbaning ta’kidlashicha, "Bavariya" "Liverpul" bilan futbolchining transferi bo‘yicha kelishuvga erishishi kerak. Oxirgi 67,5 million yevrolik taklifni "qizillar" rad etgan. Muzokaralar muvaffaqiyatsiz yakunlangan taqdirda, Dias boshqa jamoaga o‘tishi mumkin. Unga hamon "Barselona" qiziqish bildirmoqda.
Dias 2022 yildan beri "Liverpul" sharafini himoya qilmoqda. Umuman olganda, forvard jamoa safida 148 ta o‘yinda maydonga tushib, 41 ta gol urgan va 23 ta golli uzatmani amalga oshirgan. Kolumbiyalik futbolchining ingliz klubi bilan shartnomasi 2027 yilning yozigacha mo‘ljallangan.
