Angliyalik hujumchi Noni Maduekaning transferi "Arsenal" tarixidagi eng qimmat xaridlar va "Chelsi"ning eng qimmat sotuvlari top-10 taligiga kirdi, deb xabar beradi Transfermarkt portali.
Avvalroq, nufuzli jurnalist Fabrisio Romano "kanonirlar" 23 yoshli futbolchi uchun barcha bonuslarni hisobga olgan holda 55,4 mln yevro to‘laganini ma’lum qilgandi. Ta’kidlanishicha, Madueke "Arsenal" bilan 5 yillik shartnoma imzolagan. Klub allaqachon transferni rasman e’lon qilgan.
Madueke transfer narxi bo‘yicha Deklan Rays (116,6 mln yevro), Nikolya Pepe (80 mln yevro), Kay Xavers (75 mln yevro), Martin Subimendi (70 mln yevro), Pyer-Emerik Obameyang (63,8 mln yevro) va Ben Uaytdan (58,5 mln yevro) ortda qolib, "kanonirlar" tarixidagi yettinchi eng qimmat xarid bo‘ldi.
"Chelsi"ning eng qimmat sotuvlari orasida Madueke oltinchi bo‘ldi, undan yuqorida Eden Azar (120,8 mln yevro), Kay Havers (75 mln yevro), Meyson Maunt (67,7 mln yevro), Oskar (60 mln yevro) va Diyego Kosta (60 mln yevro) joylashdi.
