Yozgi seleksiyada tarkibini kuchaytirayotgan “Andijon” klubi o‘z safini yana bir mahoratli futbolchi bilan to‘ldirdi.
Qirg‘iziston milliy terma jamoasi darvozaboni Erjan Tokotayev rasman “Andijon” futbolchisiga aylandi. U bilan shartnoma imzolandi va endilikda u “Burgutlar” sharafini himoya qiladi.
Ma’lumot uchun, Erjan Tokotayev 2000 yilning 17 iyul sanasida Qirg‘izistonda tavallud topgan. Darvozabon faoliyati davomida “Dordoy” (Qirg‘iziston), “Alga” (Qirg‘iziston), “Kaspiy” (Qozog‘iston), “Turon” (Qozog‘iston) va “Shanliurfaspor” (Turkiya)da faoliyat olib borgan.
Tokotayev 2023 yildan beri Turkiya chempionatida “Shanliurfaspor”da o‘ynagan. Erjan faoliyati mobaynida hozirgacha 92 ta o‘yinda ishtirok etgan. 2021 yildan beri Qirg‘iziston milliy terma jamoasi a’zosi hisoblanadi va hozirga qadar bosh jamoada 36 ta o‘yin o‘tkazgan.
"Erjan, “Andijon”ning ahil oilasiga xush kelibsan!" - deyiladi "Andijon"ning rasmiy bayonotida.
