"Everton" "Manchester Siti" bilan hujumkor yarim himoyachi Jek Grilish transferi bo‘yicha muzokaralarni boshladi. Bu haqda The Telegraph nashri xabar berdi.
Qayd etilishicha, ehtimoliy bitim yopilishiga hali ancha bor - dastlabki muzokaralar olib borilmoqda. Kelishuvga asosiy to‘siq Grilishning yuqori maoshi bo‘lishi mumkin - "Manchester Siti" futbolchiga haftasiga 300 ming funt atrofida maosh to‘laydi.
Amaldagi shartnoma 29 yoshli Grilishni "Manchester Siti" bilan yana ikki mavsumga - 2027 yilning yarmigacha bog‘lab turadi. "Shaharliklar" safida Jek 157 ta rasmiy o‘yin o‘tkazib, 17 ta gol urgan va 23 ta golli uzatmani amalga oshirgan.
