Italiyalik darvozabon Janluiji Donnarummaga "Pari Sen-Jermen"ni tark etishi kerakligi aytildi va yaqin bir hafta ichida vaziyatga oydinlik kiritiladi. Darvozabon uchun kurashda "Manchester Siti", "Chelsi" va "Bavariya" klublari ishtirok etmoqda, deb xabar beradi Football Italia.
Manbaga ko‘ra, yaqin kunlarda "Manchester Siti" darvozabon uchun kurashga faol qo‘shilishga tayyor. Shuningdek, kuni kecha "Bavariya" ham qiziqish bildirgandi. "Chelsi" vaziyatni kuzatib bormoqda, ammo hozircha Italiya terma jamoasi darvozabonining transferi bo‘yicha hech qanday rasmiy qadam tashlagani yo‘q.
Avvalroq, "PSJ" sport direktori Luish Kampush "Lill" darvozaboni Lyuk Shevalening sotib olinishi fonida jamoaning amaldagi birinchi raqamli futbolchisi Janluiji Donnarummaning ketishini talab qilayotgani haqida xabar berilgandi.













