"Barselona" rahbariyati ikki nafar yangi futbolchi - darvozabon Joan Garsiya va hujumchi Markus Reshfordni ro‘yxatdan o‘tkazishga ruxsat oldi. Bu haqda Ispaniyaning Marca nashri xabar bermoqda.

Manbaga ko‘ra, ular bugun, 15 avgust kuni boshlanadigan La Liga yangi mavsumining dastlabki o‘yinlari uchun qaydnomaga kiritishga ulgurishmoqchi.

Ilgari klub moliyaviy feyr-pley cheklovlari va maoshlarning yuqori chegarasidan oshib ketishi tufayli ko‘pchilik yangi o‘yinchilarni ro‘yxatdan o‘tkaza olmagan. Reshfordga ariza berish uchun rahbarlar byudjet taqchilligi holatida 7 million yevro shaxsiy mablag‘ to‘lanishini rasman kafolatlashlari kerak edi. "Barselona"dagilar defisit transferlar hisobiga qoplanishini va to‘lovlar talab qilinmasligini kutishmoqda. Garsiyani ro‘yxatdan o‘tkazish uchun Kataloniya klubi La Liga komissiyasiga Mark-Andre ter Shtegenning tibbiy xulosasini yubordi va uning tasdiqlanishini kutdi. Bundan tashqari, himoyachi Inigo Martinesning "Barselona"ni tark etishi ham yangi futbolchilarni ro‘yxatdan o‘tkazishga yordam berdi.

Ispaniya chempionatining yangi mavsumi 15 avgust kuni start oladi. Dastlabki turda "Barselona" 16 avgust kuni "Malyorka" mehmoni bo‘ladi.