Londonning "Arsenal" klubi hujumchisi Kay Xavers tizzasidan jarohat oldi. Bu haqda jurnalist Devid Ornshteyn xabar bermoqda.

Manbaga ko‘ra, "Arsenal"ning tibbiy shtabi yaqin soatlarda jarohatning og‘irlik darajasini baholaydi. Biroq, hozirdanoq "kanonirlar" Xaversning pozisiyasiga yangi futbolchi sotib olish imkoniyatini ko‘rib chiqmoqda, deya ta’kidlaydi jurnalist.

O‘tgan mavsumda 26 yoshli germaniyalik futbolchi barcha musobaqalarda 36 ta o‘yin o‘tkazib, 15 ta gol urdi va beshta golli uzatmani o‘z hisobiga yozdirib qo‘ydi. Aytish kerakki, futbolchi turli jarohatlar tufayli 20 dan ortiq o‘yinni o‘tkazib yubordi.