Markus Reshford "Barselona" safida ilk bor asosiy tarkibda maydonga tushdi. Jamoa "Levante"ga qarshi o‘yinning birinchi bo‘limini muvaffaqiyatsiz o‘tkazdi (0:2) va tanaffusda Xans-Diter Flik angliyalik futbolchini almashtirdi. Bu vaqtga kelib vinger 30 ta uzatma amalga oshirdi va ularning barchasi aniq chiqdi. Shuningdek, 27 yoshli futbolchi darvoza tomon bitta zarba yo‘lladi va ikkita muvaffaqiyatli dribling amalga oshirdi.
Ikkinchi bo‘limda "Barsa"ning ishlari ancha yaxshi ketdi: kataloniyaliklar tezda javob gollarini kiritishdi, o‘yin oxirida esa raqiblarning avtogoli evaziga g‘alabani ilib ketishdi - 3:2.
Markus Reshford "Manchester Yunayted"dan sotib olish imkoniyati bilan joriy mavsum yakuniga qadar ijaraga olingan. Avvalgi "Malyorka"ga qarshi bahsda futbolchi 69-daqiqada zaxiradan maydonga tushgandi.













