O‘zbekistonlik UFC jangchisi Bogdan Guskovning navbatdagi raqibi ma’lum bo‘ldi. Sportchining murabbiyi Gor Azizyanning ma’lum qilishicha, Guskov sobiq chempion, yarim og‘ir vazn toifasida jang qiluvchi polshalik Yan Blaxovichga qarshi oktagonga chiqadi.

Blaxovich yarim og‘ir vazn toifasida jang qiladigan sportchilar reytingida 5-o‘rinni egallab turibdi. Guskov esa 10-pog‘onada joy olgan.

Bogdan so‘nggi jangini joriy yilning iyul oyida, UFC on AB 9 turnirida o‘tkazgan edi. U rossiyalik Nikita Krilovga qarshi jang qilgan va birinchi raunddayoq nokaut orqali g‘alaba qozongandi. Hozirda Guskovning hisobida 18 g‘alaba va 3 mag‘lubiyat bor.

Blaxovich esa oxirgi bor mart oyida, UFC Fight Night 255 turnirida Karlos Ulbergga qarshi oktagonga chiqib, hakamlar qaroriga ko‘ra mag‘lub bo‘lgan edi. U umumiy hisobda 41 ta jang o‘tkazgan bo‘lib, 29 ta g‘alaba, 11 ta mag‘lubiyat va 1 ta durang natija qayd etgan.