Kamerunlik darvozabon Andre Onana endi "Manchester Yunayted"ning rejalarida yo‘q. talkSPORT xabariga ko‘ra, "qizil iblislar" 29 yoshli darvozabonni Saudiya Arabistoni chempionatiga qo‘yib yuborishga tayyor.
Manbaga ko‘ra, mankunianliklar afrikalik futbolchining transferi bo‘yicha nomi oshkor etilmagan bitta klub bilan muzokara olib bormoqda. Transfermarkt portali bahosiga ko‘ra, darvozabonning bozor narxi 25 million yevroni tashkil etadi. Onana ingliz klubi bilan 2028 yil yozigacha shartnoma majburiyatlari bilan bog‘langan.
Andre o‘tgan mavsum Angliya chempionatida 34 ta o‘yinda ishtirok etib, 44 ta to‘p o‘tkazib yuborgan. Kamerunlik to‘qqiz uchrashuvda darvozasi daxlsizligini saqlab qolgan.
