Braziliya terma jamoasi bosh murabbiyi Karlo Anchelotti Neymar milliy jamoaga chaqirilishi uchun qanday shart bajarilishi kerakligini ma’lum qildi.
Italiyalik mutaxassisning aytishicha, u shaxsan futbolchi bilan suhbatlashib, nega oxirgi FIFA kunlari uchun qaydnomaga kiritilmaganini tushuntirgan.
«Agar u optimal holatiga qaytib olsa, terma jamoa safida bo‘lishi qiyin bo‘lmaydi. Men u bilan gaplashdim va aytdim: «Senda to‘liq tiklanish va jahon chempionatida jamoaga yordam berish uchun vaqt bor», — deya Anchelottining so‘zlarini ESPN keltiradi.
Eslatib o‘tamiz, Anchelotti Neymarni 2026 yilgi JCH saralash bosqichining so‘nggi o‘yinlariga chaqirmagan edi. Neymarning aytishicha, bu qaror uning jarohati bilan bog‘liq emas, balki murabbiy qarori bo‘lib, u bunga hurmat bilan qaragan.
Joriy mavsumda «Santos» hujumchisi 20ta o‘yinda maydonga tushib, 6ta gol urdi va 3ta golli uzatma berdi.













