«Qizilqum» bosh murabbiyi Akmal Rustamov Superliga 21-tur doirasidagi «Qo‘qon-1912» (2:1)ga qarshi o‘yindan so‘ng matbuot anjumanida ishtirok etdi.

"Bugungi o‘yinga yaxshi tayyorgarlik ko‘rgandik. Tanaffusdan foydalanib uchta o‘rtoqlik o‘yinilarini o‘tkazgandik. «Qo‘qon-1912» ni o‘rganib chiqqandik, ammo bugun ularning o‘yiniga moslashib qoldik. Yuzaga kelgan vaziyatlardan unumli foydalana olmadik. O‘yinni ko‘rib chiqib, tahlil qilamiz. Yigitlarga rahmat aytaman", — deya so‘z boshladi Rustamov.

— Ikkinchi bo‘limda qiziq holat bo‘ldi. Jamoangizning 5-raqamli o‘yinchisi Dilshod Komilovni zaxiraga olmoqchi bo‘ldingiz, ammo u xohlamadi. Jamoaning ichki muhiti yaxshi emasmi?

— Jamoada hammasi yaxshi, barchasi rejamiz bo‘yicha ketmoqda. U maydonda meni tushunmadi, bu vaziyatni o‘rganamiz.

— Bugungi Qo‘qon shamoli «Qizilqum»ga qanchalik qarshilik ko‘rsatdi?

— Bu ob-havoda «Qo‘qon-1912» ham, «Qizilqum» ham o‘ynaydi. Vaziyatlardan foydalanganimizda barchasi boshqacha bo‘lardi. Ob-havoni ayblamaslik kerak. Ushbu o‘yinni tahlil qilib, «Nasaf»ga qarshi tayyorgarlikni bugundan boshlaymiz.

— «Qizilqum» ayniqsa ikkinchi bo‘limda juda ham hujumkor harakat qildi. Navoiy jamoasi bunga qadar 9 ta o‘yindan beri mag‘lub bo‘lmay kelayotgandi va bu rekord yangilanishi mumkinligi haqida xabarlar tarqalgandi. Ammo, jamoa oldingi o‘yinlarga nisbatan juda bosh ko‘rindi.

— Futbolchilarimga yana bir bor rahmat aytaman. Ular borlarini berishdi. Ehtimol shamol, ehtimol ob-havo ta’sir qilgandir. Bu o‘yinni tahlil qilganimizdan so‘ng aniq bo‘ladi.