«Қизилқум» бош мураббийи Акмал Рустамов Суперлига 21-тур доирасидаги «Қўқон-1912» (2:1)га қарши ўйиндан сўнг матбуот анжуманида иштирок этди.

"Бугунги ўйинга яхши тайёргарлик кўргандик. Танаффусдан фойдаланиб учта ўртоқлик ўйиниларини ўтказгандик. «Қўқон-1912» ни ўрганиб чиққандик, аммо бугун уларнинг ўйинига мослашиб қолдик. Юзага келган вазиятлардан унумли фойдалана олмадик. Ўйинни кўриб чиқиб, таҳлил қиламиз. Йигитларга раҳмат айтаман", — дея сўз бошлади Рустамов.

— Иккинчи бўлимда қизиқ ҳолат бўлди. Жамоангизнинг 5-рақамли ўйинчиси Дилшод Комиловни захирага олмоқчи бўлдингиз, аммо у хоҳламади. Жамоанинг ички муҳити яхши эмасми?

— Жамоада ҳаммаси яхши, барчаси режамиз бўйича кетмоқда. У майдонда мени тушунмади, бу вазиятни ўрганамиз.

— Бугунги Қўқон шамоли «Қизилқум»га қанчалик қаршилик кўрсатди?

— Бу об-ҳавода «Қўқон-1912» ҳам, «Қизилқум» ҳам ўйнайди. Вазиятлардан фойдаланганимизда барчаси бошқача бўларди. Об-ҳавони айбламаслик керак. Ушбу ўйинни таҳлил қилиб, «Насаф»га қарши тайёргарликни бугундан бошлаймиз.

— «Қизилқум» айниқса иккинчи бўлимда жуда ҳам ҳужумкор ҳаракат қилди. Навоий жамоаси бунга қадар 9 та ўйиндан бери мағлуб бўлмай келаётганди ва бу рекорд янгиланиши мумкинлиги ҳақида хабарлар тарқалганди. Аммо, жамоа олдинги ўйинларга нисбатан жуда бош кўринди.

— Футболчиларимга яна бир бор раҳмат айтаман. Улар борларини беришди. Эҳтимол шамол, эҳтимол об-ҳаво таъсир қилгандир. Бу ўйинни таҳлил қилганимиздан сўнг аниқ бўлади.