«Real» himoyachisi Din Xeysenning «Real Sosyedad»ga qarshi o‘yindagi maydondan chetlatilishi xatolik sifatida tan olinishi mumkin.
La Liganing 4-turidan o‘rin olgan uchrashuvda (2:1) bosh hakam Xesus Xil Mansano 32-daqiqada «Real» futbolchisini oxirgi umid foli uchun to‘g‘ridan-to‘g‘ri qizil kartochka bilan jazoladi.
Marca nashrining yozishicha, Fransisko Soto Balirak Ispaniya Texnika hakamlar qo‘mitasi (CTA) prezidenti etib tayinlangandan so‘ng mamlakatda hakamlik tizimida bir qator o‘zgarishlar amalga oshirilgan.
Endilikda har bir uchrashuvdan so‘ng hakamlarni 3 nafar mutaxassis baholaydi. Ular orasida stadionlardagi hakam-delegatlar va CTAning texnik direktorlari ham bor. Ular tomonidan maxsus hisobotlar tayyorlanadi va hakamning harakatlari, xatolari tahlil qilinib, reytinglar shakllantiriladi. Bu esa hakamning kelgusi o‘yinlarda ishlash imkoniyatlariga ta’sir ko‘rsatadi.
Xeysenning o‘yindan chetlatilishi tortishuvlarga sabab bo‘lgan va ushbu holat hafta mobaynida rasman izohlanishi va xatolik sifatida e’tirof etilishi mumkin. Ayniqsa, VAR hakami Xorxe Figeroa Vaskes Xil Mansanoni monitorga chaqirmagani uchun tanqid ostiga olinmoqda. U vaqtincha vazifasidan chetlatilishi mumkin. Ushbu epizod CTA tomonidan ham batafsil tahlil qilinadi.
