«Реал» ҳимоячиси Дин Хейсеннинг «Реал Сосьедад»га қарши ўйиндаги майдондан четлатилиши хатолик сифатида тан олиниши мумкин.
Ла Лиганинг 4-туридан ўрин олган учрашувда (2:1) бош ҳакам Хесус Хиль Мансано 32-дақиқада «Реал» футболчисини охирги умид фоли учун тўғридан-тўғри қизил карточка билан жазолади.
Marca нашрининг ёзишича, Франсиско Сото Балирак Испания Техника ҳакамлар қўмитаси (CTA) президенти этиб тайинлангандан сўнг мамлакатда ҳакамлик тизимида бир қатор ўзгаришлар амалга оширилган.
Эндиликда ҳар бир учрашувдан сўнг ҳакамларни 3 нафар мутахассис баҳолайди. Улар орасида стадионлардаги ҳакам-делегатлар ва CTAнинг техник директорлари ҳам бор. Улар томонидан махсус ҳисоботлар тайёрланади ва ҳакамнинг ҳаракатлари, хатолари таҳлил қилиниб, рейтинглар шакллантирилади. Бу эса ҳакамнинг келгуси ўйинларда ишлаш имкониятларига таъсир кўрсатади.
Хейсеннинг ўйиндан четлатилиши тортишувларга сабаб бўлган ва ушбу ҳолат ҳафта мобайнида расман изоҳланиши ва хатолик сифатида эътироф этилиши мумкин. Айниқса, ВАР ҳаками Хорхе Фигероа Васкес Хиль Мансанони мониторга чақирмагани учун танқид остига олинмоқда. У вақтинча вазифасидан четлатилиши мумкин. Ушбу эпизод CTA томонидан ҳам батафсил таҳлил қилинади.
