Andrey Chemerkin — afsonaviy og‘ir atletikachi, 1996 yilgi Olimpiada chempioni 12 sentyabr kuni olamdan o‘tdi.

Uning o‘limi Rossiya Og‘ir atletika federasiyasi matbuot xizmati tomonidan tasdiqlanib, “butun og‘ir atletika olami uchun o‘rnini hech narsa bosolmaydigan yo‘qotish” deya baholandi.

Chemerkin 1996 yil Atlanta Olimpiadasida super og‘ir vazn toifasida oltin, 2000 yil Sidneydagi Olimpiadada esa bronza medalni qo‘lga kiritgan.

U xalqaro maydonda hukmron sportchi sifatida tanilib, to‘rt karra jahon va ikki karra Yevropa chempioni bo‘lgan.

Faoliyati davomida sakkiz marta jahon rekordini yangilagan va shu tufayli muxlislar hamda hamkasblari uni “sayyoradagi eng kuchli odam” deb atashgan. Federasiya uni “butun bir davr timsoli, afsonaviy inson” sifatida ta’rifladi.

Chemerkinning katta sportdagi yo‘li 1993 yilda Melburndagi jahon chempionatida bronza medalini qo‘lga kiritish bilan boshlandi. Bir yil o‘tib, u kumush medalni yutdi, 1995 yilda esa Guanchjoudagi jahon chempionatida ilk oltin medalini qo‘lga kiritdi.

Kuchli “siltab ko‘tarish” texnikasi bilan mashhur bo‘lgan Chemerkin ko‘pincha dastlabki bosqich — “dast ko‘tarish”da (snatch) raqiblaridan ortda qolardi, biroq “siltab ko‘tarish”da ajoyib natijalar qayd etib, g‘alabaga erishardi.

1996 yil Atlanta Olimpiadasida u dastlab nemis afsonasi Ronni Vellerdan 2,5 kilogramm ortda qolgan edi.

Veller “siltab ko‘tarish”da 255 kilogramm ko‘tardi, biroq Chemerkin 260 kilogrammni zabt etib, jahon rekordini yangiladi va Olimpiada chempioniga aylandi.

Oradan bir yil o‘tib, 262,5 kilogrammni ko‘tarib, yana rekord o‘rnatdi. 1997–1999 yillarda ketma-ket uch bor jahon chempionligini qo‘lga kiritgan Chemerkin 2000 yil Sidneydagi Olimpiadada bronza medal bilan faoliyatini davom ettirgan.

Andrey Chemerkinning nomi og‘ir atletika tarixida oltin harflar bilan yozilib, uning qahramonliklari kelajak avlod sportchilari uchun doimo ilhom manbai bo‘lib qoladi.