Milanning "Inter" klubi hujumchisi Franchesko Pio Espozito Chempionlar ligasi doirasidagi "Ayaks"ga (2:0) qarshi o‘yindan so‘ng intervyu berdi.
20 yoshli italiyalik futbolchi kecha "neradzurrilar"ning asosiy tarkibida jarohat tufayli maydonga tusha olmagan sardor Lautaro Martinesning o‘rnini egalladi.
"Men Jekoga doim qoyil qolganman", - deya e’tirof etdi umidli hujumchi. - Men uni "Inter"dagi mashg‘ulotlarda ko‘rganman. U faqat gollar uchun o‘ynamagan - uning uchun jamoaga yordam berish muhim edi. Hozirgi hujumdagi sheriklarim jahon darajasidagi futbolchilar, buni bugun Markus Tyuram yaqqol ko‘rsatib berdi. Men ulardan har kuni yangi narsalarni o‘rganishga harakat qilaman", - dedi Espozito.
"Inter" "Ayaks"ga qarshi o‘yinda uch ochkoni Markus Tyuramning dubli evaziga qo‘lga kiritdi.
