“Chelsi”ning ukrainalik vingeri Mixaylo Mudrik futboldagi faoliyatini yakunlab, yengil atletikaga o‘tishga qaror qilgan. Bu haqda Marca nashri xabar berdi.

Mudrik 2023 yil yanvar oyida “Chelsi”ga 100 million yevro evaziga transfer qilingan edi. Tez orada futbolchi Premyer Ligada rekord tezlik qayd etdi– 36,67 km/soat. Biroq 2024-yilning oxirlarida o‘tkazilgan doping nazoratida Mixayloning qonida taqiqlangan modda aniqlangan.

Doping jazosi tufayli futbol maydonlaridan chetlatilgan futbolchi endi sportdagi faoliyatini boshqa yo‘nalishda davom ettirishga qaror qilgan. U 2028 yil Los-Anjelesda bo‘lib o‘tadigan Yozgi Olimpiada o‘yinlarida yugurish bo‘yicha Ukraina terma jamoasi tarkibida ishtirok etishni rejalashtirmoqda. Mudrik Olimpiadada qatnashish uchun World Athletics tomonidan belgilangan normativlarni bajarishi va 2027-yilgi saralash bosqichida muvaffaqiyatli ishtirok etishi lozim bo‘ladi.

Eslatib o‘tamiz, Mixaylo Mudrik faoliyati davomida jami 150 ta o‘yinda maydonga tushib, o‘z hisobiga 22 ta gol hamda 30 ta assist yozdirib qo‘ygan. Futbolchining “Chelsi” bilan shartnomasi 2031-yilga qadar amal qiladi. Mudrik “Chelsi”ga qadar Ukrainaning “Shaxtyor” klubida faoliyat olib borgan.