"Manchester Siti" hujumchisi Erling Xoland Angliya Premyer-ligasida gol urish bo‘yicha Norvegiya rekordini takrorladi.
25 yoshli futbolchi yakshanba kuni "Arsenal"ga qarshi kechgan o‘yinda (1:1) "shaharliklar"ning yagona golini kiritdi. Endi Xolandning hisobida APLdagi 91ta gol bor - u bu ko‘rsatkich bo‘yicha hamyurti, "Manchester Yunayted"ning sobiq futbolchisi Ole Gunnar Sulsherga yetib oldi.
Ahamiyatlisi, bu natijaga erishish uchun Xolandga 102ta, Sulsherga esa 235ta o‘yin kerak bo‘lgan.
Erling Xoland 2022 yilning yozidan buyon "Manchester Siti" sharafini himoya qilib kelmoqda. U ikki marta Angliya chempionatining eng yaxshi to‘purari bo‘lgan.













