"Barselona" bosh murabbiyi Xans-Diter Flik "Oltin to‘p"ni topshirish marosimi haqida gapirdi.
Tadbir 22 sentyabr, dushanba kuni Parijda bo‘lib o‘tadi. Avvalroq, "ko‘k-anorranglilar" bosh murabbiyi marosimni hurmat qilishini va jamoa futbolchilari bilan birga marosimda ishtirok etishdan mamnun bo‘lishini aytgandi. Jurnalistlar bu jumlada o‘tgan yili sovrinni boykot qilishga qaror qilgan Madridning "Real" klubi sha’niga kinoya topishdi. Nemis murabbiy bunday taxminlarni yoqtirmadi.
"Qo‘ysangiz-chi... Men u yerga boraman, chunki murabbiylik nominasiyasida qatnashaman va bizda turli sovrinlarga da’vogar futbolchilar bor. Buning "Real"ga hech qanday aloqasi yo‘q. Menga savolingiz yoqmayapti. "Real" va boshqa klublar haqida gapirmoqchi emasman - e’tiborimni faqat "Barselona"ga qaratganman," - deya javob berdi Flik "Xetafe"ga (3:0) qarshi o‘yindan keyin o‘tkazilgan matbuot anjumanida.
