Federiko Kyeza yangi mavsumda «Liverpul»dagi faoliyati haqida fikr bildirdi.

Italiyalik yarimhimoyachi APLda birinchi golini urdi va kechagi Angliya liga kubogi bahsida «Sautgempton»ga qarshi (2:1) ikki golli uzatma berdi.

«O‘tgan yil juda og‘ir bo‘ldi, ammo o‘ylaymanki, men murabbiy (Arne Slot) ko‘rmoqchi bo‘lgan darajaga chiqolmadim. Lekin uning tanlovini tushundim. Bu yil esa hammasi boshqacha. Jismoniy va ruhiy jihatdan o‘zimni ancha yaxshi his qilyapman. Murabbiy ham buni ko‘rib, menga ko‘proq imkoniyat berdi.

Premyer-liga o‘yinlariga hissa qo‘shganimdan xursandman. «Liverpul» har bir futbolchisidan shuni kutyapti. Murabbiy ham, boshqa o‘yinchilar ham shuni xohlaydi. Agar sen «Liverpul» uchun o‘ynasan, vaziyatni o‘zgartirishga qodir bo‘lishing kerak.

Hozir men juda baxtliman va kelajakda yana ko‘proq imkoniyat olish uchun ko‘proq mehnat qilishim lozim. Men top-klubda o‘ynayapman. Balki bu dunyodagi uchta eng yaxshi klubdan biri.

Bu «Liverpul». Albatta, ular eng kuchli futbolchilarni xarid qiladi va raqobat yuqori bo‘ladi. Agar raqobatni istamasam, boshqa klubga o‘tishim mumkin. Lekin men raqobatni xohlayman! Shu yerda o‘ynashni istayman va, o‘ylaymanki, raqobat seni kuchliroq qiladi.

Murabbiy menga dastlabki to‘rtta o‘yinda imkoniyat berdi va o‘ylaymanki, jamoaga yordam bera olishimni ko‘rsatdim», — dedi «Liverpul» yarimhimoyachisi.