Федерико Кьеза янги мавсумда «Ливерпуль»даги фаолияти ҳақида фикр билдирди.

Италиялик яримҳимоячи АПЛда биринчи голини урди ва кечаги Англия лига кубоги баҳсида «Саутгемптон»га қарши (2:1) икки голли узатма берди.

«Ўтган йил жуда оғир бўлди, аммо ўйлайманки, мен мураббий (Арне Слот) кўрмоқчи бўлган даражага чиқолмадим. Лекин унинг танловини тушундим. Бу йил эса ҳаммаси бошқача. Жисмоний ва руҳий жиҳатдан ўзимни анча яхши ҳис қиляпман. Мураббий ҳам буни кўриб, менга кўпроқ имконият берди.

Премьер-лига ўйинларига ҳисса қўшганимдан хурсандман. «Ливерпуль» ҳар бир футболчисидан шуни кутяпти. Мураббий ҳам, бошқа ўйинчилар ҳам шуни хоҳлайди. Агар сен «Ливерпуль» учун ўйнасан, вазиятни ўзгартиришга қодир бўлишинг керак.

Ҳозир мен жуда бахтлиман ва келажакда яна кўпроқ имконият олиш учун кўпроқ меҳнат қилишим лозим. Мен топ-клубда ўйнаяпман. Балки бу дунёдаги учта энг яхши клубдан бири.

Бу «Ливерпуль». Албатта, улар энг кучли футболчиларни харид қилади ва рақобат юқори бўлади. Агар рақобатни истамасам, бошқа клубга ўтишим мумкин. Лекин мен рақобатни хоҳлайман! Шу ерда ўйнашни истайман ва, ўйлайманки, рақобат сени кучлироқ қилади.

Мураббий менга дастлабки тўртта ўйинда имконият берди ва ўйлайманки, жамоага ёрдам бера олишимни кўрсатдим», — деди «Ливерпуль» яримҳимоячиси.