Madridning “Real” klubi turkiyalik futbolchi Arda Gyuler uchun narx belgiladi. Defensa Central nashrining xabariga ko‘ra, “qirollik klubi” yarim himoyachi uchun 100 million yevro miqdorida taklif tushsa, muzokaralarni boshlashga tayyor.

Manbada qayd etilishicha, hozirda Gyulerga Angliyaning bir qancha klublari — xususan, “Arsenal”, “Tottenhem” va “Nyukasl”, shuningdek, Italiyaning “Milan” hamda Germaniyaning “Leypsig” va Dortmundning “Borussiya” jamoalari qiziqish bildirmoqda.

Turkiyalik futbolchi joriy mavsum ancha samarali o‘yin namoyish etmoqda. U “Real” safida 9 ta uchrashuvda maydonga tushib, o‘z hisobiga 3 ta gol va 4 ta golli uzatma yozdirib qo‘ygan. Transfermarkt portali Ardaning transfer qiymatini 45 million yevroga baholamoqda. Biroq yaqin kunlarda uning narxi oshishi kutilmoqda.

Shunga qaramay, “Real” klubi Gyulerni sotish tarafdori emas. Chunki u murabbiy Xabi Alonsoning jamoasida asosiy futbolchilardan biri hisoblanadi. Biroq katta moliyaviy taklif bo‘lsa, muzokara boshlashi mumkinligi aytilmoqda.

Ma’lumot uchun, 20 yoshli futbolchining “Real” bilan tuzgan shartnomasi 2026 yil yozigacha amal qiladi.