Мадриднинг “Реал” клуби туркиялик футболчи Арда Гюлер учун нарх белгилади. Defensa Central нашрининг хабарига кўра, “қироллик клуби” ярим ҳимоячи учун 100 миллион евро миқдорида таклиф тушса, музокараларни бошлашга тайёр.

Манбада қайд этилишича, ҳозирда Гюлерга Англиянинг бир қанча клублари — хусусан, “Арсенал”, “Тоттенҳэм” ва “Ньюкасл”, шунингдек, Италиянинг “Милан” ҳамда Германиянинг “Лейпциг” ва Дортмунднинг “Боруссия” жамоалари қизиқиш билдирмоқда.

Туркиялик футболчи жорий мавсум анча самарали ўйин намойиш этмоқда. У “Реал” сафида 9 та учрашувда майдонга тушиб, ўз ҳисобига 3 та гол ва 4 та голли узатма ёздириб қўйган. Transfermarkt портали Арданинг трансфер қийматини 45 миллион еврога баҳоламоқда. Бироқ яқин кунларда унинг нархи ошиши кутилмоқда.

Шунга қарамай, “Реал” клуби Гюлерни сотиш тарафдори эмас. Чунки у мураббий Хаби Алонсонинг жамоасида асосий футболчилардан бири ҳисобланади. Бироқ катта молиявий таклиф бўлса, музокара бошлаши мумкинлиги айтилмоқда.

Маълумот учун, 20 ёшли футболчининг “Реал” билан тузган шартномаси 2026 йил ёзигача амал қилади.