Futbol bo‘yicha Tojikiston terma jamoasiga serbiyalik mutaxassis Goran Stevanovich bosh murabbiy bo‘ldi. Bu haqda mamlakat futbol federasiyasi matbuot xizmati xabar bermoqda.
Stevanovich bu lavozimda so‘nggi ikki yil davomida terma jamoani boshqargan, iste’foga chiqarilgan gruziyalik murabbiy Gela Shekiladze o‘rnini egalladi.
Xabarlarga ko‘ra, shartnoma Osiyo Kubogi-2027 saralash bosqichi yakuniga qadar uzaytirish imkoniyati bilan tuzilgan.
Terma jamoa bosh murabbiyligiga nomzodlar ro‘yxatida Tojikiston terma jamoasining sobiq ustozi Petar Segrt, Turkmaniston terma jamoasining sobiq ustozi xorvatiyalik Ante Mishe, germaniyalik Villi Kronxardt, shuningdek, bir qator rossiyalik mutaxassislar bor edi.
Qizig‘i shundaki, Goran Stevanovich 1980 yillarda Belgradning "Partizan" jamoasida yugoslaviyalik yulduzlar Predrag Miyatovich, Zlatko Zaxovich, shuningdek, O‘zbekiston milliy jamoasining sobiq bosh murabbiyi Srechko Katanes bilan birga o‘ynagan.
Murabbiy sifatida Stevanovich Serbiya chempionligini qo‘lga kiritgan "Partizan", Afrika kubogi yarim finaliga chiqqan Gana terma jamoasi, Serbiya yoshlar terma jamoasi, shuningdek, Gresiya va Xitoy jamoalari bilan ishlagan. Mutaxassisning so‘nggi ish joyi Serbiya chempionatining ikkinchi divizioni vakili "Napredak" klubi bo‘lgan.
Eslatib o‘tamiz, Tojikiston terma jamoasi Osiyo Kubogi saralashida 2-turdan so‘ng o‘z guruhida peshqadamlik qilmoqda. Keyingi saralash o‘yinlari 9 va 14 oktyabr kunlari Maldiv orollari terma jamoasiga qarshi o‘tkaziladi.
