"Liverpul"ning sobiq o‘yinchisi Daniel Starridj jamoaga "Bavariya"ga o‘tib ketgan Luis Dias jiddiy yetishmayotganini ta’kidladi.

Starrijning aytishicha, Dias "Liverpul"ning pressing tizimida asosiy o‘yinchi bo‘lgan va o‘zining fidokorona o‘yin uslubi bilan himoyaga ko‘maklashgan. Sobiq futbolchining fikricha, aynan uning tirishqoqligi va jamoa uchun bor kuchini safarbar qilishga tayyorligi mersisaydliklarga hozir yetishmayotgan muvozanatni yaratgan. Uning so‘zlariga ko‘ra, jamoa endi hujumda kim bunday vazifani o‘z zimmasiga olishi mumkinligini aniqlashi kerak.

"Luis Dias - bu juda katta yo‘qotish. U jamoada bo‘lganida, pressing paytida aynan u hujum uchligida pressingni tashkil qilardi. U himoya uchun o‘zini ayamas edi", - dedi Daniel Sky Sports’ga.

Eslatib o‘tamiz, kolumbiyalik futbolchi yozda "Liverpul"ni tark etib, "Bavariya" bilan shartnoma tuzgan edi. Bundesligada Myunxen klubi safida olti o‘yinda u beshta gol urdi va to‘rtta golli uzatmani amalga oshirdi.