"Ливерпуль"нинг собиқ ўйинчиси Даниэль Старридж жамоага "Бавария"га ўтиб кетган Луис Диас жиддий етишмаётганини таъкидлади.
Старрижнинг айтишича, Диас "Ливерпуль"нинг прессинг тизимида асосий ўйинчи бўлган ва ўзининг фидокорона ўйин услуби билан ҳимояга кўмаклашган. Собиқ футболчининг фикрича, айнан унинг тиришқоқлиги ва жамоа учун бор кучини сафарбар қилишга тайёрлиги мерсисайдликларга ҳозир етишмаётган мувозанатни яратган. Унинг сўзларига кўра, жамоа энди ҳужумда ким бундай вазифани ўз зиммасига олиши мумкинлигини аниқлаши керак.
"Луис Диас - бу жуда катта йўқотиш. У жамоада бўлганида, прессинг пайтида айнан у ҳужум учлигида прессингни ташкил қиларди. У ҳимоя учун ўзини аямас эди", - деди Даниэль Sky Sports’га.
Эслатиб ўтамиз, колумбиялик футболчи ёзда "Ливерпуль"ни тарк этиб, "Бавария" билан шартнома тузган эди. Бундеслигада Мюнхен клуби сафида олти ўйинда у бешта гол урди ва тўртта голли узатмани амалга оширди.
