Xalqaro o‘rtoqlik uchrashuvi doirasida O‘zbekiston va Kuvayt terma jamoalari 9 oktyabr, payshanba kuni Toshkentdagi “Olimpiya” stadionida maydonga tushdi. Fabio Kannavaro boshchiligidagi O‘zbekiston terma jamoasi bahsda 2:0 hisobida g‘alaba qozondi.
O‘yindagi hisob 10-daqiqada ochildi. Hujumchi Eldor Shomurodov Muhammadqodir Hamraliyevning ajoyib uzatmasidan so‘ng birga-bir vaziyatga chiqib, raqib darvozasini ishg‘ol qildi. 19-daqiqada esa oradagi farq ikki golga yetdi. Otabek Shukurovning pasidan so‘ng Hojimat Erkinov individual mahoratini namoyon etib, ikkinchi marta Kuvayt darvozasiga yo‘l topdi.
21-daqiqada Abbosbek Fayzullayev jarohat olib, maydonni tark etdi. Uning o‘rniga Azizbek Turg‘unboyev o‘yinga qo‘shildi. Bo‘limning qolgan daqiqalari ham keskin kurash ostida o‘tdi, ammo hisob o‘zgarmadi.
Ikkinchi bo‘limda ham O‘zbekiston ustunlikni saqlab qoldi. Hojimat Erkinov va Eldor Shomurodov kabi futbolchilar bir necha bor xavfli hujumlar uyushtirdi. 63-daqiqada hisob yiriklashishi mumkin edi, biroq Otabek Shukurov hakam tomonidan belgilangan 11 metrlik jarima zarbasini golga aylantira olmadi.
Shu tariqa, O‘zbekiston terma jamoasi Fabio Kannavaroning debyut uchrashuvida Kuvayt ustidan 2:0 hisobida zafar quchdi.
O‘rtoqlik uchrashuvi
O‘zbekiston — Kuvayt 2:0
Gollar: 1:0 — Shomurodov (10), 2:0 — Erkinov (19)













