Portugaliya terma jamoasi bosh murabbiyi Roberto Martines JCH-2026 saralash turnirida Irlandiyaga qarshi qozonilgan g‘alaba (1:0) haqida fikr bildirdi.
"Bu aynan biz kutgan o‘yin bo‘ldi. Irlandiya terma jamoasi sentyabr oyidagiga qaraganda ancha kuchli ekanini ko‘rsatdi va bu yerga yaralangan hayvondek keldi. Ularning javob berishini kutgandik. Ammo eng muhimi - xotirjam bo‘lish, ularga qarshi hujumga imkon bermaslik va standart vaziyatlardan keladigan har qanday xavfni bartaraf etish edi. Natijada, ular butun o‘yin davomida birorta ham jiddiy xavfli zarbani amalga oshira olishmadi.
Birinchi golni ertaroq urishimiz kerak edi. To‘psiz o‘yinimiz juda yuqori darajada bo‘ldi. Jamoaning o‘zini tutishi menga yoqdi - biz o‘zimizni yo‘qotmadik. Bu og‘ir, ammo mutlaqo haqli g‘alaba bo‘ldi," - deya Martinesning so‘zlarini UYEFA rasmiy sayti keltiradi.
Portugaliya 7 ochko to‘plab, F guruhida peshqadamlik qilmoqda. Irlandiya esa 2 ochko bilan kvartet jadvalining oxirgi o‘rnini egalladi.
