Португалия терма жамоаси бош мураббийи Роберто Мартинес ЖЧ-2026 саралаш турнирида Ирландияга қарши қозонилган ғалаба (1:0) ҳақида фикр билдирди.
"Бу айнан биз кутган ўйин бўлди. Ирландия терма жамоаси сентябрь ойидагига қараганда анча кучли эканини кўрсатди ва бу ерга яраланган ҳайвондек келди. Уларнинг жавоб беришини кутгандик. Аммо энг муҳими - хотиржам бўлиш, уларга қарши ҳужумга имкон бермаслик ва стандарт вазиятлардан келадиган ҳар қандай хавфни бартараф этиш эди. Натижада, улар бутун ўйин давомида бирорта ҳам жиддий хавфли зарбани амалга ошира олишмади.
Биринчи голни эртароқ уришимиз керак эди. Тўпсиз ўйинимиз жуда юқори даражада бўлди. Жамоанинг ўзини тутиши менга ёқди - биз ўзимизни йўқотмадик. Бу оғир, аммо мутлақо ҳақли ғалаба бўлди," - дея Мартинеснинг сўзларини УЕФА расмий сайти келтиради.
Португалия 7 очко тўплаб, F гуруҳида пешқадамлик қилмоқда. Ирландия эса 2 очко билан квартет жадвалининг охирги ўрнини эгаллади.
