Myunxenning "Bavariya" klubi qanot himoyachisi Alfonso Devis tizzasining xochsimon paylari shikastlanganidan keyin tiklanish jarayoni haqida gapirdi.
"Men yugurish mashqlarini bajaraman va mashg‘ulotlar o‘tkazaman. Hozir o‘ng oyog‘imda mushak yig‘ish bilan shug‘ullanyapman. Jarohat - bu futbolning bir qismi. Hech qachon o‘zingizga achinmaslik va shikoyat qilmaslik kerak. Men qaytishim ustida ishlayapman. Umid qilamanki, kelajakda bunday bo‘lmaydi," - deya kanadalik himoyachining so‘zlarini keltiradi nemis grandi matbuot xizmati.
24 yoshli himoyachining Myunxen grandi bilan mehnat shartnomasi muddati 2030 yil iyun oyi oxirida tugaydi. Transfermarkt portali Devisning bozor narxini 50 million yevroga baholamoqda.













