Portugaliya terma jamoasining 40 yoshli markaziy hujumchisi Krishtianu Ronaldu terma jamoadagi yutug‘i haqida fikr bildirdi. Hujumchi jahon chempionati saralash turnirlarida gol urish bo‘yicha jahon rekordini o‘rnatdi. Futbolchining hisobida 41 ta gol bor.
"Men uchun terma jamoadagi o‘yinlar juda muhim. Bunday yutuqqa erishganimdan faxrlanaman. Buning uchun menga yordam bergan barchaga minnatdorchilik bildiraman. Noyabr oyida uchrashamiz va mundial yo‘llanmasini rasmiylashtiramiz," - deyiladi yulduz futbolchining ijtimoiy tarmoqdagi sahifasida.
Kecha bo‘lib o‘tgan JCH-2026 saralashida Portugaliya Vengriya bilan durang o‘ynadi (2:2). Krishtianu bahsda ikkita gol urdi.













