«Milan» va AQSH terma jamoasi hujumchisi Kristian Pulishich terma jamoalar o‘rtasidagi o‘rtoqlik uchrashuvida jarohat olgani sababli kelasi bir oyda o‘yinlarda ishtirok etolmasligi mumkin. Bu haqda ESPN xabar berdi.
Uning terma jamoasi Avstraliyaga qarshi o‘rtoqlik uchrashuvida 2:1 hisobida g‘alaba qozondi, ammo «rossoneri» forvardi 31-daqiqayoq maydonni tark etdi.
Manba ma’lumoti ko‘ra, futbolchi hali Italiyaga qaytib ulgurmagan, chunki uning reysi kechiktirilgan. «Milan» klubi yaqin soatlarda futbolchini tibbiy tekshiruvdan o‘tkazadi. Agar jarohat jiddiy ekani tasdiqlansa, Pulishich «Fiorentina», «Piza», «Atalanta», «Roma» va «Parma»ga qarshi uchrashuvlarni o‘tkazib yuboradi.
Joriy mavsumda Pulishich klub safida barcha turnirlarda 8 ta o‘yinda maydonga tushib, 6 ta gol urgan va 2 ta golli pas bergan.













