Fransiyaning “PSJ” klubi “Barselona”ning 18 yoshli vingeri Lamin Yamalga jiddiy qiziqish bildirmoqda. Goal.com va jurnalist Roman Molinaning ma’lumotlariga ko‘ra, parijliklar rekord darajadagi transfer amalga oshirish imkoniyatini ko‘rib chiqmoqda.

Yamalning kataloniyaliklar bilan tuzgan shartnomasi 2031 yilgacha amal qiladi va unda 1 milliard dollarlik kompensasiya miqdori ko‘rsatilgan. Shuningdek, xabarlarga ko‘ra, “PSJ” bu summani to‘liq to‘lamasa ham, 2017 yilda Neymar uchun to‘langan 222 million dollarlik jahon rekordini yangilashi mumkin bo‘lgan taklif tayyorlamoqda.

Manbalarning yozishicha, parijliklar Yamalning ehtimoliy transferi bo‘yicha dastlabki muzokaralarni o‘tkazgan, ammo klub rasmiylari hozircha rasmiy taklif berilmaganini ma’lum qilgan. Ehtimoliy kelishuv qiymati 277 million dollarga yetishi mumkin.

Joriy mavsumda Lamin Yamal “Barselona” safida 5 ta o‘yinda maydonga tushib, 2 ta gol va 3 ta assist muallifi bo‘lgan.