Франциянинг “ПСЖ” клуби “Барселона”нинг 18 ёшли вингери Ламин Ямалга жиддий қизиқиш билдирмоқда. Goal.com ва журналист Роман Молинанинг маълумотларига кўра, парижликлар рекорд даражадаги трансфер амалга ошириш имкониятини кўриб чиқмоқда.

Ямалнинг каталонияликлар билан тузган шартномаси 2031 йилгача амал қилади ва унда 1 миллиард долларлик компенсация миқдори кўрсатилган. Шунингдек, хабарларга кўра, “ПСЖ” бу суммани тўлиқ тўламаса ҳам, 2017 йилда Неймар учун тўланган 222 миллион долларлик жаҳон рекордини янгилаши мумкин бўлган таклиф тайёрламоқда.

Манбаларнинг ёзишича, парижликлар Ямалнинг эҳтимолий трансфери бўйича дастлабки музокараларни ўтказган, аммо клуб расмийлари ҳозирча расмий таклиф берилмаганини маълум қилган. Эҳтимолий келишув қиймати 277 миллион долларга етиши мумкин.

Жорий мавсумда Ламин Ямал “Барселона” сафида 5 та ўйинда майдонга тушиб, 2 та гол ва 3 та ассист муаллифи бўлган.