«Andijon» klubi Osiyo Chempionlar ligasi 2 musobaqasi doirasida Bahraynning «Al-Xolidiya» jamoasini qabul qilishidan xabaringiz bor.

Ayni paytda «B» guruhida «Al-Xolidiya» ikkita turdan so‘ng 4 ochko jamg‘arib peshqadam bo‘lib turibdi. Ilk turda Qatarning «Al-Ahli» jamoasi bilan 0:0 o‘ynagan bo‘lsa, ikkinchi turda Turkmanistonning «Arkadag‘» klubini 2:0 hisobida mag‘lubiyatga uchratdi.

«Al-Xolidiya»ga 2020 yilda asos solingan. Klub uy o‘yinlarini “Bahrayn milliy” stadionida o‘tkazadi. Ushbu arena o‘z bag‘riga 30000 tomoshabinni sig‘dira oladi.

Bu jamoaning erishgan yutuqlari bor. O‘tgan yili Bahrayn qirol Kubogi sohibiga aylangan bo‘lsa, undan avvalgi ketma-ket ikki yil davomida  Bahrayn chempioni bo‘lgan. Umuman olganda, «Al-Xolidiya» hisobida 5 ta sovrin bor. Ikki marta qirol Kubogi sohibi, ikki marta mamlakat chempionligi va bir marta Superkubokni qo‘lga kiritgan. Klub 2021 yildan beri sovrin yutib kelmoqda.

«Al-Xolidiya» Andijonga safari oldidan milliy chempionatning 5-tur doirasida “Bahrayn SK” jamoasini qabul qildi va 4:0 hisobida raqibini tor-mor keltirdi. Hozirgi paytda 5 ta o‘yinda 3 g‘alaba va 2 mag‘lubiyat qayd etib, 9 ochko bilan 5-o‘rinda bormoqda.

Klubni mahalliy 44 yoshli mutaxassis Ali Ashur boshqarib bormoqda.

Shuningdek, jamoada legionerlarga ko‘p e’tibor qaratishadi. Jumladan, 13 nafar xorijlik futbolchilar to‘p surishmoqda. «Al-Xolidiya»ning eng qimmat futbolchisi marokashlik legionerlardan biri - 31 yoshli himoyachi Ayub El Amlud bo‘lib, uning transfermarktdagi narxi 800 ming yevroni tashkil qiladi. U shu yilning avgust oyida jamoaga qo‘shilgan.

Shu yilning yozida «So‘g‘diyona»ga qo‘shilgan, muxlislarimizga tanish bo‘lgan serbiyalik himoyachi Filip Ivanovich yarim mavsum «Al-Xolidiya» sharafini himoya qilgan.

«Andijon» - «Al-Xolidiya» uchrashuvi 22 oktyabr kuni “Bobur arena”da soat 18:45 da boshlanadi.