2025 yil 22 oktyabr kuni Italiyaning Milan shahrida O‘zbekiston futzal federasiyasi prezidenti Bekzod Mamatqulov hamda mashhur «Milan» futbol klubi rahbarlari o‘rtasida rasmiy uchrashuv bo‘lib o‘tdi.

Mazkur uchrashuvda «Milan» klubi vise-prezidenti – Boshqaruv direktori Mauro Taolo, shuningdek, klubning doimiy elchilari — 2006 yilda jahon chempioni bo‘lgan Kristian Zakkardo va braziliyalik afsonaviy futbolchi Serjinyo ishtirok etdi.

Muloqot chog‘ida tomonlar futbol, uning ajralmas qismi futzal yo‘nalishlari bo‘yicha o‘zaro hamkorlikni yo‘lga qo‘yish, tajriba almashish, ikki mamlakat, millat mutaxassislari uchun foydali kurslarini tashkil etish, shuningdek, turli o‘quv-amaliy loyihalarni yo‘lga qo‘yish yuzasidan kelishuvga erishildi.

Mauro Taolo bilan suhbat chog‘ida «Milan» klubi orqali Italiya futzalining ilg‘or tajribalarini O‘zbekistonga olib kirish, ikki mamlakat futzal federasiyalari hamkorligini o‘rnatish va rivojlantirish, kelgusida hamkorlik qilish masalalari istiqbolli yo‘nalishda muhokama qilindi.

Shu o‘rinda qayd etish kerak, 2022 yilda Italiya futboli afsonalari hamda 2025 yilda Jahon futboli yulduzlari O‘zbekistonga tashrif buyurishgandi. Har ikkala tadbir qatnashchilari bo‘lgan italiyalik mezbonlar O‘zbek zaminiga tashrifidan ulkan taassurotlar olganliklarini mamnuniyat bilan qayd etishdi. Kelajakda shu kabi tadbirlarni doimiy yo‘lga qo‘yish masalalari ham muhokama qilindi.

Tashrif yakunida tomonlar esdalik sovg‘alarini almashishdi. Bekzod Mamatqulov uchrashuvdan so‘ng xizmat safari bilan Fransiya poytaxti Parij shahriga jo‘nab ketdi.